Chhava : मोक्काचे आरोपी ‘छावा’ पाहायला आले अन् पोलिसांच्या जाळ्यात सापडले! पुण्यातील वैभव टॉकीजमध्ये थरार
Chhava : पुण्यात ‘छावा’ चित्रपटाच्या प्रदर्शनाने प्रेक्षकांमध्ये प्रचंड उत्साह निर्माण केला असताना, एक धक्कादायक घटना समोर आली आहे. पुण्यातील हडपसर येथील वैभव टॉकीजमध्ये हा चित्रपट पाहण्यासाठी आलेल्या दोन सराईत गुन्हेगारांना पोलिसांनी अटक केली. गुन्हे शाखेच्या युनिट सहाच्या पथकाने केलेल्या या कारवाईने खळबळ उडाली आहे.
अटक करण्यात आलेले आरोपी कोण?
अटक करण्यात आलेल्या आरोपींची नावे धर्मेनसिंग ऊर्फ भगतसिंग सुरजितसिंग भादा (वय २२) आणि बादशाहसिंग पोलादसिंग भोंड (वय २३, दोघेही रा. शिव कॉलनी, दिघी) अशी आहेत. दोघांवर मोक्का (महाराष्ट्र संघटित गुन्हेगारी नियंत्रण कायदा), एनडीपीएस (अंमली पदार्थ विरोधी कायदा) आणि शस्त्र कायद्याअंतर्गत गुन्हे दाखल आहेत.
पोलिसांनी कसा लावला आरोपींचा माग?
गुन्हे शाखेच्या युनिट सहाने शुक्रवारी (२१ फेब्रुवारी) कोम्बिंग ऑपरेशन राबवले. त्यावेळी अंमलदार नितीन मुंढे आणि कानिफनाथ कारखेले यांना आरोपींविषयी माहिती मिळाली. आरोपी ‘छावा’ चित्रपट पाहण्यासाठी वैभव टॉकीजमध्ये आल्याचे समजल्यानंतर सहायक निरीक्षक मदन कांबळे यांच्या नेतृत्वाखाली पोलिस पथकाने कारवाई करत आरोपींना अटक केली. सध्या त्यांना पुढील तपासासाठी दिघी पोलिसांच्या ताब्यात देण्यात आले आहे.
‘छावा’ चित्रपटाची घौडदौड सुरूच!
छत्रपती संभाजी महाराजांच्या जीवनावर आधारित ‘छावा’ चित्रपटाने केवळ सात दिवसांत २०० कोटींच्या कमाईचा टप्पा पार केला आहे. २०२५ मधील हा २०० कोटींची कमाई करणारा पहिला चित्रपट ठरला आहे. आतापर्यंत या चित्रपटाने तब्बल २१९.७५ कोटींची कमाई केली आहे. विकी कौशलने चित्रपटात छत्रपती संभाजी महाराजांची भूमिका साकारली असून, प्रेक्षकांकडून त्याला उत्स्फूर्त प्रतिसाद मिळत आहे.
ही घटना ‘छावा’ चित्रपटाच्या लोकप्रियतेचे आणि त्याभोवती निर्माण झालेल्या वातावरणाचे प्रत्यंतर देते, मात्र अशा घटनांमुळे पोलिसांची सतर्कता अधिक वाढली आहे.
