दुबई: भारताने चॅम्पियन्स ट्रॉफीच्या अंतिम फेरीत प्रभावी कामगिरी करत प्रवेश केला. विराट कोहली आपल्या दमदार खेळीने पुन्हा एकदा भारतीय संघाचा आधारस्तंभ ठरला. विराटच्या ८४ धावांच्या खेळीच्या जोरावर भारताने ऑस्ट्रेलियावर चार विकेट्स राखून विजय मिळवला आणि सेमी फायनलमध्ये दबदबा निर्माण केला.
अखेरच्या षटकांत हार्दिक पंड्याच्या तुफानी फटकेबाजीने सामन्यात रंगत आणली. ऑस्ट्रेलियाने दिलेल्या २६५ धावांचा पाठलाग करताना भारताची सुरुवात रोहित शर्माने केली. त्याने काही आक्रमक फटके खेळले, मात्र मोठी खेळी साकारू न शकल्याने रोहित २८ धावांवर बाद झाला.
शुभमन गिलही निराशाजनक खेळ करत फक्त ८ धावा करून बाद झाला. भारताने दोन्ही सलामीवीर गमावले असले तरी विराट कोहली आणि श्रेयस अय्यरने ९१ धावांची महत्वपूर्ण भागीदारी रचत भारताच्या डावाला स्थैर्य दिले. श्रेयस अय्यर ४५ धावांवर बाद झाल्यानंतरही विराटने धावांचा ओघ सुरू ठेवला.
विराट कोहलीने आपले अर्धशतक पूर्ण करत आक्रमक फलंदाजी कायम ठेवली. अक्षर पटेलच्या साथीने त्याने विजयाच्या दिशेने पाऊले उचलली, मात्र अक्षर बाद झाल्यावर लोकेश राहुलच्या साथीने तो पुन्हा धावा जमवू लागला. दुर्दैवाने विराटचे शतक हुकले.
या आधी ऑस्ट्रेलियाने टॉस जिंकून प्रथम फलंदाजी घेतली. ट्रेव्हिस हेडने जलद धावा जमवण्याचा प्रयत्न केला, परंतु वरुण चक्रवर्तीने त्याला ३९ धावांवर रोखले. त्यानंतर कर्णधार स्टीव्हन स्मिथने ठोस खेळ करत अर्धशतक झळकावले.
मात्र, मोहम्मद शमीने स्मिथला ७३ धावांवर बाद करत ऑस्ट्रेलियाला मोठा धक्का दिला. त्यानंतर अलेक्स कॅरीने अर्धशतक झळकावून ऑस्ट्रेलियाची धावसंख्या वाढवली, मात्र त्यालाही विराटने बाद केले, त्यामुळे ऑस्ट्रेलियाला २६४ धावांवरच रोखण्यात भारताला यश मिळाले.
