Yashwant Verma : दिल्ली उच्च न्यायालयातील एका न्यायमूर्तींच्या घरात मोठ्या प्रमाणावर रोख रक्कम सापडल्यामुळे न्यायपालिका आणि सार्वजनिक क्षेत्रात खळबळ उडाली आहे. या प्रकरणामुळे सर्वोच्च न्यायालयाच्या कॉलेजिअमने त्या न्यायमूर्तींना त्यांच्या मूळ ठिकाण असलेल्या अलाहाबाद हायकोर्टमध्ये बदली करण्याची शिफारस केली आहे.
ही घटना घडली त्यावेळी, त्या न्यायमूर्तींच्या सरकारी निवासस्थानी आग लागली होती. आग विझवण्यासाठी आलेल्या अग्निशमन दलाच्या अधिकाऱ्यांना घरात मोठ्या प्रमाणावर रोख पैसे सापडले, ज्यामुळे ही बाब अधिकच गाजली.
यशवंत वर्मा असे त्या न्यायमूर्तींचे नाव असून, त्यांच्या राजीनाम्याची मागणी काही न्यायमूर्त्यांनी केली आहे. जर वर्मा यांनी राजीनामा देण्यास नकार दिला, तर सर्वोच्च न्यायालयाने 1999 च्या प्रक्रियेनुसार तपास सुरु करावा, अशी मागणी केली आहे.
हायकोर्टाच्या न्यायमूर्तींच्या घरात एवढ्या प्रमाणात रोख रक्कम सापडल्याने न्यायपालिकेतील वर्तमन आणि पारदर्शकतेसाठी गंभीर प्रश्न उभे राहिले आहेत. सरन्यायाधीश संजीव खन्ना यांच्या नेतृत्वाखाली वर्मा यांची बदली करण्याचा निर्णय घेण्यात आला आहे.
आग लागल्यावर वर्मा त्या वेळी दिल्लीमध्ये नव्हते, आणि त्यांच्या कुटुंबीयांनी पोलिस व अग्निशमन दलाला घटनास्थळी बोलवले होते. आग विझवताना अधिकाऱ्यांना एका खोलीत मोठ्या प्रमाणावर रोख रक्कम सापडली, ज्याची माहिती पोलिसांनी ताबडतोब वरिष्ठ अधिकाऱ्यांना दिली. यानंतर सर्वोच्च न्यायालयाला त्याची सूचना देण्यात आली. वर्मा 2021 मध्ये अलाहाबाद हायकोर्टमधून दिल्ली उच्च न्यायालयात बदली होऊन आले होते.
सर्वोच्च न्यायालयाच्या कॉलेजियमने या प्रकरणाची तातडीने बैठक घेऊन न्यायमूर्तींच्या बदलीची शिफारस केली. सूत्रांच्या माहितीनुसार, या प्रकरणावर अहवाल आल्यानंतर कॉलेजियमने गुरुवारी आपत्कालीन बैठक घेतली. तसेच, अंतर्गत चौकशीसाठीही विचार सुरू आहे, मात्र अद्याप अंतिम निर्णय घेतलेला नाही. काही न्यायमूर्त्यांनी महाभियोग दाखल करण्याची मागणी केली असून, फक्त बदली केल्यास न्यायपालिकेवरील जनतेचा विश्वास कमी होईल, अशी चिंता व्यक्त केली आहे.
