कुर्ल्यात झालेल्या बस अपघातात एका महिलेचा मृत्यू झाला असताना माणुसकीला काळिमा फासणारी घटना घडली. जखमींना रुग्णालयात पोहोचवण्याची धावपळ सुरू असतानाच, मृत फातिमा अन्सारी यांच्या हातातील सोन्याच्या बांगड्या काढून नेल्याचा व्हिडिओ सोशल मीडियावर व्हायरल झाला आहे. या घटनेमुळे मृत महिलेच्या कुटुंबीयांमध्ये संताप आणि दु:ख व्यक्त होत आहे.
“आई रक्ताच्या थारोळ्यात होती, आणि तो बांगड्या काढतोय”
मृत फातिमा अन्सारी यांच्या मुलीने, मेहरुनिसा, आपल्या भावनांना वाट मोकळी करत म्हटलं, “माझी आई रक्ताच्या थारोळ्यात पडली होती, आणि तो माणूस तिच्या हातातील बांगड्या काढत होता. त्याला लाज तरी वाटते का?” अश्रू अनावर होत मेहरुनिसाने पुढे सांगितले की, “तो व्यक्ती आमच्या आईचा मोबाईल आणि बॅग परत देतो, पण बांगड्या परत करत नाही. आम्ही पोलिसांत तक्रार दाखल केली असून दोषींवर कठोर कारवाई व्हावी.”
व्हिडिओमधील प्रकार आणि तपासाची मागणी
अपघातस्थळी गर्दी जमली असताना, हेल्मेट घातलेला एक तरुण महिलेच्या हातातील दागिने उतरवत असल्याचं व्हिडिओमध्ये स्पष्ट दिसत आहे. गर्दीतून काहींनी त्याला विरोध केला, पण तो तरुण म्हणाला, “मी तिच्या कुटुंबीयांना मोबाईल आणि दागिने परत देईन.” मात्र, बांगड्या कुटुंबीयांना दिल्या गेल्याचं त्याने केलेलं आश्वासन अद्याप पूर्ण झालेलं नाही.
पोलिसांचा तपास सुरू
फातिमा अन्सारी या डॉ. आंबेडकर नगर येथील देसाई क्लिनिकमध्ये आया म्हणून काम करत होत्या. त्या अपघातात बसखाली सापडून ठार झाल्या. या दुर्दैवी घटनेनंतर व्हायरल झालेल्या व्हिडिओच्या आधारे पोलिसांनी तपास सुरू केला आहे.
कुटुंबीयांची मागणी: दोषींवर कारवाई करा
मेहरुनिसा यांनी अपघातानंतर त्यांच्या आईची अशी अवस्था कोणीही पाहू नये, असे सांगत आरोपीवर कठोर कारवाईची मागणी केली आहे. “आज आमच्यावर दुःख आलं आहे; उद्या दुसऱ्यावर येऊ नये,” असेही त्या म्हणाल्या.
समाजाला संदेश की ही घटना समाजाला माणुसकी आणि जबाबदारीचे भान ठेवण्याचा संदेश देते. अपघातग्रस्तांच्या मदतीसाठी धाव घेण्याऐवजी त्यांचा लाभ घेण्याच्या वृत्तीवर कठोर कारवाईची गरज आहे.
