सध्या पुण्यात अपघाताच्या घटना वाढत आहेत. आता पिंपरी-चिंचवड परिसरात पुन्हा एकदा हिट अँड रनची घटना समोर आली आहे. यामुळे एकच खळबळ उडाली. एका चार चाकीने महिलेला जोरदार धडक देऊन उडवल्याचे समोर आले आहे. महिलेला धडक दिल्यानंतर या कार चालकाने समोर असलेल्या दुचाकीला आणि रिक्षालाही देखील धडक दिली.
यामुळे मोठा थरार यावेळी घडला आहे. यामध्ये महिला गंभीर जखमी झाले असून तिच्यावर उपचार सुरू आहेत. या घटनेचं धडकी भरवणारं सीसीटीव्ही फुटेजही समोर आलं आहे. यामध्ये अपघाताची तीव्रता समोर आली आहे. भर दुपारी हा अपघात झाला आहे.
या घटनेनंतर पिंपरी चिंचवड पोलिसांनी कार चालकाला ताब्यात घेतले असून त्याच्यावर गुन्हा दाखल करण्यात आला आहे. याबाबत पोलीस तपास करत आहेत. पिंपरी गावातून ही महिला रस्त्याने पायी जात होती. तेवढ्यात समोरुन एक कार भरधाव वेगात आली आणि त्या कारने थेट महिलेला धडक दिली.
या धडकेत महिला हवेत उडाली आणि जमिनीवर जोरदार आपटली. यानंतर कारचालकाने वेगात गाडी चालवून समोर चाललेल्या रिक्षाला देखील धडक दिली. त्यानंतर हा कारचालक घटनास्थळावरुन निघून गेला. यानंतर अनेकांनी त्याला थांबवण्याचा प्रयत्न केला मात्र तो फरार झाला. याबाबत लोकांनी पोलिसांना माहिती दिली.
दरम्यान, हा कारचालक मद्यधुंद अवस्थेत होता का? याची देखील तपासणी केली जात आहे. पिंपरी पोलिसांना कळविण्यात आल्यानंतर पिंपरी पोलिसांनी सदर कार चालकाला ताब्यात घेतले असून त्याच्यावर गुन्हा दाखल करण्यात आला आहे.
गेल्या काही दिवसांपासून अपघातात वाढ होत असतांना घटनेने पिंपरी-चिंचवड शहरात पुन्हा एकदा हिट अँड रनचे प्रकरण समोर आले आहे. पुण्यामध्ये दिवसेंदिवस हिट अँड रनच्या घटनांमध्ये वाढ होत आहे. काही दिवसांपूर्वीच पुण्यात दोघांचा हिट अँड रण या अपघातात मृत्यू झाला होता. ते प्रकरण देशात गाजले होते.