बीडमधून एक दुःखद घटना समोर आली आहे. शिरूरजवळ फलके मळ्यानजीक रस्त्याच्या कडेला असलेल्या कंटेनरवर मोटार आदळुन जोरदार अपघात झाला. यामध्ये एकाच कुटूंबातील चौघे ठार झाले. यामुळे मोठी खळबळ उडाली. याबाबत पोलीस तपास करत आहेत.
मृतांत ४ वर्षांच्या चिमुकलीचा समावेश आहे. ही घटना दुपारी बाराच्या सुमारास घडली. याबाबत माहिती अशी की, अश्विन भोंडवे यांच्या चाकण येथील मेहुण्याला लग्नासाठी पाहुणे बघायला येणार असल्याने ते कुंटुबासह गाडीतुन चाकणकडे चालले होते.
फलके मळ्याजवळ पुण्याच्या दिशेने तोंड करून उभ्या असलेल्या कंटेनरवर त्यांची मोटार धडकली. यात अश्विन हे गंभीर जखमी झाले तर सुदाम सिंधुताई व आनंदी यांचा जागीच मृत्यु झाला. यावेळी रोडवर गर्दी झाली.
नंतर रांजणगाव एमआयडीसी पोलिसांनी घटनास्थळी धाव घेऊन क्रेनच्या साहाय्याने कंटेनरखाली घुसलेली गाडी बाहेर काढली. तसेच जखमींना बाहेर काढले. नंतर वाहतूक सुरू करण्यात आली.
या अपघातात कारचा अक्षरशः भुगा झाला आहे. यामध्ये सुदाम शंकर भोंडवे (वय ६६), सिंधुताई सुदाम भोंडवे (वय ६०), कार्तिकी (वय ३२) व आनंदी अश्वीन भोंडवे (वय ४ जि. बीड) अशी या अपघातातील मृतांची नावे आहेत. यामुळे हळहळ व्यक्त होतेय.
दरम्यान, मोटारीत अडकुन सुदाम भोंडवे, सिंधुताई आणि आनंदी यांचा जागीच मृत्यू झाला. कार्तिकी या जखमी झाल्याने त्यांना उपचारार्थ नेतांना वाटेतच त्यांनी जीव सोडला. याबाबत पोलिस तपास करत आहेत.