सध्या चंद्रयान चंद्रावर पोहोचल्यानंतर इस्रोमध्ये काम करणाऱ्या शास्त्रज्ञांचे कौतुक केले जात आहे. जगभरातून कौतुकाची थाप पडत असताना आता एक धक्कादायक घटना घडली आहे. कर्नाटकची राजधानी बंगळुरूत इस्रोमध्ये काम करणाऱ्या शास्त्रज्ञाच्या कारवर हल्ला झाल्याची घटना घडली आहे.
यामुळे मोठी खळबळ उडाली आहे. शास्त्रज्ञ बंगळुरूत असलेल्या इस्रोच्या कार्यालयात जात असताना हा प्रकार घडला. या घटनेची माहिती शास्त्रज्ञाने सोशल मीडियावर शेअर केली आहे. यामुळे संताप व्यक्त केला जात आहे.
बंगळुरू जवळच्या जुन्या पासपोर्ट रोडवरील एचएएल अंडरपासजवळ शास्त्रज्ञाच्या कारवर हल्ला झाला. यावेळी शास्त्रज्ञ कारमध्येच होते. याबाबत ते म्हणाले, मी इस्रोच्या कार्यालयात जात होतो. त्यावेळी एक दुचाकीस्वार कारसमोर आला.
कार त्याला धडकणार होती. ती टाळण्यासाठी मी ब्रेक दाबले. दुचाकीस्वाराने हेल्मेट घातलेले नव्हते. दुचाकीस्वार भररस्त्यात शिवीगाळ करू लागला, असे शास्त्रज्ञ आशिष लांबा यांनी सांगितले आहे.
ही घटना २९ ऑगस्टला घडली. दुचाकीस्वार कारजवळ आला, त्याने शिवीगाळ करत टायरला लाथा मारल्या. त्यांनी दुचाकीचा क्रमांकदेखील पोस्टमध्ये नमूद केला आहे. यामुळे कारवाई करण्याची मागणी केली जात आहे.
दुचाकीस्वार बेशिस्तपणे वाहन चालवत आमच्या कारसमोर आला. त्यामुळे अचानक ब्रेक दाबावा लागल्याचे त्यांनी पोस्टमध्ये लिहिले आहे. आवश्यक ती कारवाई करावी, असेही लांबा यांनी पोस्टमध्ये म्हटले आहे. बंगळुरू पोलिसांच्या अधिकृत ट्विटर हँडलवरुन काही वेळातच त्यांना प्रतिसाद मिळाला असून तपास सुरू आहे.