पॅरिस ऑलिम्पिक 2024 मध्ये कमाल करत भारताच्या विनेश फोगाटने मोठी कामगिरी केली आहे. विनेशने फायनलमध्ये प्रवेश केला आहे. यामुळे तिचे सगळीकडे कौतुक होत आहे. महिला कुस्तीच्या फायनलमध्ये प्रवेश करणारी विनेश पहिली भारतीय महिला कुस्तीपटू ठरली आहे. यामुळे देशभरातून अभिनंदन केले जात आहे.
यामध्ये 50 किलो वजनी गटात सेमीफायनलमध्ये तिने एकतर्फी विजय मिळवला. समोरच्या महिला कुस्तीपटूला रिंगमध्ये डोकं वर काढण्याची संधीच दिली नाही. यामुळे अनेकजण तिच्यावर टीका करत होते ते देखील आता तिचे कौतुक करत आहेत. विनेश फोगाटने ऑलिम्पिकमध्ये तिचं पदक निश्चित केल आहे. काँग्रेस नेते खासदार राहुल गांधी यांनी तिला शुभेच्छा दिल्या आहेत.
त्यांनी विनेशसाठी पोस्ट केली आहे. एकाच दिवशी जगातील तीन अव्वल कुस्तीपटूना हरवल्यानंतर विनेशसोबत आज पूर्ण देश भावुक आहे. ज्यांनी विनेश आणि तिच्या सहकाऱ्यांचा संघर्ष नाकारला. त्यांचा हेतू आणि क्षमतेवर प्रश्नचिन्ह निर्माण केलं, त्या सर्वांना आज उत्तर मिळालय, असे राहुल गांधींनी म्हटले आहे.
तसेच ते म्हणाले, विनेश फोगाटच्या या विजयाने संपूर्ण देशात उत्साह आहे. सर्व जण तिला शुभेच्छा देत आहेत. आज भारताच्या शूर, हिम्मतवान मुलीसमोर सत्तेच पूर्ण तंत्र कोलमडून पडलय, ज्यांनी तिला रडवलं. चॅम्पियन्सची हीच ओळख असते. ते आपलं उत्तर मैदानात देतात. तुला खूप शुभेच्छा विनेश.
पॅरिसमधल्या तुझ्या यशाचा प्रतिध्वनी दिल्लीमध्ये स्पष्ट ऐकू येतोय असे त्यांनी पोस्टमध्ये म्हटल आहे. दरम्यान, आता विनेश फोगाटकडून सर्वांना सुवर्णपदकाची अपेक्षा आहे. विनेशने सेमीफायनल मॅचमध्ये क्यूबाच्या युसनेलिस गुजमॅन लोपेजवर विजय मिळवला.
आता पुढील सामन्यात तिचा खेळ कसा असेल याकडे सर्वांचे लक्ष लागले आहे. सध्या भारताला अजून या स्पर्धेत गोल्ड मेडल मिळाले नाही. यामुळे कोण भारताचे हे स्वप्न पूर्ण करणार याकडे सर्वांचे लक्ष लागले आहे.