Subodh Walankar : तरुण आणि प्रतिभावान अभिनेता तसेच लेखक सुबोध वाळणकर यांच्या अचानक निधनाने संपूर्ण कलाविश्वात हळहळ व्यक्त केली जात आहे. सोमवारी हृदयविकाराच्या तीव्र झटक्याने त्यांनी अखेरचा श्वास घेतला. त्यांच्या जाण्याने रंगभूमी आणि नाट्यक्षेत्रात मोठी पोकळी निर्माण झाली आहे.
नाट्य आणि रंगभूमीवर ठसा
सुबोध वाळणकर यांनी राज्य नाट्यस्पर्धा, एकांकिका आणि व्यावसायिक नाटकांमध्ये आपल्या अभिनयाची छाप पाडली होती. विशेषतः २१७ पद्मिनी धाम या नाटकातील लक्षवेधी भूमिका आणि यंदाच्या सवाई करंडक विजेत्या चिनाब से रावी तक या एकांकिकेतल्या दमदार अभिनयामुळे त्यांनी रसिक प्रेक्षकांच्या मनावर राज्य केले होते. त्यांच्या जाण्याने सहकलाकार आणि चाहत्यांमध्ये शोककळा पसरली आहे.
सहकाऱ्यांच्या भावनांची अभिव्यक्ती
अभिनेता प्रसाद दाणी यांनी सुबोधच्या अचानक जाण्यावर भावूक होत त्याच्याशी जोडलेल्या आठवणी शेअर केल्या. त्यांनी लिहिले, “सुबहच बोललो होतो ना भावा? ८ फेब्रुवारीला ‘चिनाब से रावी तक’ चा प्रयोग आहे ना? मग असं कसं अचानक जाऊ शकतोस?” अशा शब्दांत त्यांनी आपल्या भावना व्यक्त केल्या. तसेच “तू नेहमी हसवायचास, पण आता डोळे मात्र पाणावतील…” असेही त्यांनी नमूद केले.
सुबोधच्या योगदानाची आठवण
डोंबिवलीतील ‘क्राऊड नाट्यसंस्था’ आणि ‘स्टोरिया प्रॉडक्शन’ यांच्या चिनाब से रावी तक या एकांकिकेला सवाई करंडक स्पर्धेत सर्वोत्कृष्ट पुरस्कार मिळाला होता. या एकांकिकेत सुबोधने महत्त्वपूर्ण भूमिका साकारली होती. ज्येष्ठ गीतकार गुलजार यांच्या रावीपार या कथेवर आधारित या एकांकिकेत फाळणीच्या काळातील एका विवाहित जोडप्याची हृदयस्पर्शी कहाणी मांडण्यात आली होती.
याशिवाय, त्यांनी बॉम्बे १७ आणि २१७ पद्मिनी धाम या व्यावसायिक नाटकांतूनही आपल्या अभिनय कौशल्याची छाप सोडली होती. त्यांच्या अकाली निधनाने संपूर्ण कला आणि नाट्यविश्वात शोक व्यक्त करण्यात येत आहे.