Amol Kolhe : बाळाजी आवजीच्या पणतूने रागातून शंभूराजांची बदनामी केली, आता गप्प बसलो तर..; अमोल कोल्हेंनी सोडलं मौन

Amol Kolhe : लक्ष्मण उतेकर दिग्दर्शित आणि विकी कौशल अभिनीत छावा हा चित्रपट सध्या बॉक्स ऑफिसवर चांगलीच चर्चा गाजवत आहे. छत्रपती संभाजी महाराज यांच्या जीवनावर आधारित या सिनेमाबाबत प्रेक्षकांत मोठी उत्सुकता आहे.

मात्र, ऐतिहासिक चित्रपट म्हटला की वाद अपरिहार्य असतात, आणि छावा देखील त्याला अपवाद राहिलेला नाही. काही इतिहासतज्ज्ञ आणि अभ्यासकांनी चित्रपटात दाखवलेला इतिहास चुकीचा असल्याचा दावा केला आहे, तर काहींच्या मते हे वास्तवाच्या अगदी जवळचे चित्रण आहे.

छत्रपती संभाजी महाराजांबद्दल इतिहासात काही ठिकाणी चुकीची माहिती पसरवण्याचा प्रयत्न झाल्याचे अनेक अभ्यासकांनी सांगितले आहे. विशेषतः त्यांना नशेच्या आहारी गेलेले दाखवले गेले, ही बाब अनेकांना खटकली आहे. या संदर्भात राजकीय नेते आणि अभिनेते अमोल कोल्हे यांनी आपली स्पष्ट भूमिका मांडली आहे. स्वराज्यरक्षक संभाजी या लोकप्रिय मालिकेत त्यांनी संभाजी महाराजांची भूमिका साकारली होती आणि त्या काळात त्यांनी इतिहासाचा सखोल अभ्यास केला होता.

अमोल कोल्हे यांचा सडेतोड प्रतिवाद

अमोल कोल्हे यांनी नुकताच एक व्हिडिओ शेअर करून संभाजी महाराजांविषयी पसरवलेल्या चुकीच्या इतिहासावर रोष व्यक्त केला आहे. “जर मी काही बोललो नाही, तर मूकसंमती समजली जाईल, म्हणून बोलतोय,” असे त्यांनी स्पष्टपणे नमूद केले.

ते पुढे म्हणाले की, छत्रपती संभाजी महाराजांबद्दल चुकीची माहिती सर्वप्रथम मल्हार रामराव चिटणीस यांनी चिटणीशी बखर या ग्रंथात १८११ मध्ये लिहिली. मात्र, हा ग्रंथ संभाजी महाराजांच्या मृत्यूनंतर तब्बल ११२ वर्षांनी लिहिला गेला, त्यामुळे तो समकालीन पुरावा मानता येत नाही. पुढे मोहम्मद जुबेर आणि ग्रँड ऑफ यांनीही या बखरीचा संदर्भ घेत इतिहासात चुकीच्या गोष्टी नमूद केल्या, ज्यामुळे संभाजी महाराजांची बदनामी झाली.

बदनामीमागील कटकारस्थान

अमोल कोल्हे यांच्या मते, संभाजी महाराजांनी कटकारस्थानाच्या आरोपाखाली बाळाजी आवजी चिटणीस यांना हत्तीच्या पायी दिले होते. बाळाजी आवजी चिटणीस यांचे पणतू मल्हार रामराव चिटणीस यांनी आपल्या पूर्वजांवरील रोष बखरीतून उतरवला आणि संभाजी महाराजांना बदनाम करण्याचा प्रयत्न केला. त्यानंतर स्वातंत्र्यवीर सावरकर, गोळवलकर गुरुजी आणि राम गणेश गडकरी यांनी देखील संभाजी महाराज नशेच्या आहारी गेल्याचे चुकीचे वर्णन त्यांच्या लिखाणात केले.

संभाजी महाराजांचा खरा इतिहास समोर आणण्याचे प्रयत्न

अनेक अभ्यासक आणि इतिहासकारांनी या चुकीच्या इतिहासाला आव्हान दिले. सेतू माधवराव पगडी, वा.सी. बेंद्रे, डॉ. कमल गोखले आणि डॉ. जयसिंगराव पवार यांसारख्या विद्वानांनी संभाजी महाराजांचा सत्य इतिहास समोर आणण्यासाठी अथक परिश्रम घेतले.

विकिपीडियावरील चुकीची माहिती दुरुस्त होणार

सध्या विकिपीडियावर देखील संभाजी महाराजांबद्दल काही चुकीची माहिती आहे. यासंदर्भात महाराष्ट्राचे मुख्यमंत्री देवेंद्र फडणवीस यांनी सायबर सेलला आवश्यक ती दुरुस्ती करण्याचे आदेश दिले आहेत. अमोल कोल्हे यांनी देखील त्यांच्या टीमकडून यावर लक्ष ठेवले जात असल्याचे सांगितले.

संभाजी महाराजांच्या योगदानाची खरी ओळख आवश्यक

संभाजी महाराज हे केवळ एक पराक्रमी योद्धाच नव्हे, तर विद्वान आणि दूरदृष्टी असलेले शासक होते. त्यांच्याविषयी पसरवण्यात आलेल्या चुकीच्या इतिहासावर बंदी आणली पाहिजे आणि त्यांच्या खऱ्या कार्याची महती लोकांपर्यंत पोहोचवली पाहिजे, असे अमोल कोल्हे यांनी ठामपणे सांगितले.