Varun Chakraborty : वरूण चक्रवर्ती नाहीतर भारताच्या ‘या’ दोन खेळाडूंनी आम्हाला हरवलं, न्यूझीलंडच्या कॅप्टनने उघडपणे घेतली नावं
Varun Chakraborty : चॅम्पियन्स ट्रॉफी 2025 स्पर्धेतील साखळी सामन्यात टीम इंडियाने न्यूझीलंडला 44 धावांनी पराभूत करत विजयी लय कायम राखली. भारतीय संघाने प्रथम फलंदाजी करत 249/9 धावा केल्या, त्यानंतर भेदक गोलंदाजीच्या जोरावर न्यूझीलंडचा डाव 205 धावांवर संपवला. या विजयासह भारताने आपले सेमी फायनलचे स्थान आणखी मजबूत केले आहे.
वरुण चक्रवर्तीच्या फिरकी जाळ्यात न्यूझीलंड अडकला
या सामन्यात भारतीय मिस्ट्री स्पिनर वरुण चक्रवर्तीने शानदार गोलंदाजी करत 5 विकेट्स घेतल्या आणि न्यूझीलंडच्या फलंदाजांना जखडून ठेवले. कुलदीप यादवनेही 2 विकेट्स घेत संघाच्या विजयात योगदान दिले. न्यूझीलंडकडून केन विल्यमसनने 81 धावांची झुंजार खेळी केली, पण अन्य फलंदाज मोठी खेळी करण्यात अपयशी ठरले.
श्रेयस अय्यरचा संयमी खेळ, भारताला दिला मजबूत आधार
भारतीय संघाच्या सुरुवातीच्या फळीला न्यूझीलंडच्या गोलंदाजांनी मोठा धक्का दिला. रोहित शर्मा (15), शुभमन गिल (2) आणि विराट कोहली (11) स्वस्तात बाद झाल्यामुळे संघ संकटात सापडला होता. मात्र, श्रेयस अय्यरने जबाबदारी स्वीकारत 79 धावांची महत्त्वपूर्ण खेळी केली. अक्षर पटेलने 42 धावा, तर हार्दिक पंड्याने 45 धावा करून संघाला लढण्यासारखी धावसंख्या गाठून दिली.
सँटनरने मान्य केली टीम इंडियाच्या स्पिनर्सची ताकद
पराभवानंतर न्यूझीलंडचा कर्णधार मिचेल सँटनर म्हणाला, “खेळपट्टी मंद असेल याची कल्पना होती, पण भारतीय फिरकीपटूंनी अप्रतिम गोलंदाजी केली. श्रेयस अय्यर आणि हार्दिक पंड्याने आमच्यावर दडपण आणले. आम्ही अपेक्षेपेक्षा जास्त स्पिनला तोंड दिले. आता आमच्या पुढील सामन्यात दक्षिण आफ्रिकेविरुद्ध चांगली तयारी करावी लागेल.”
भारतीय संघाचा सेमी फायनलमधील आत्मविश्वास वाढला
या विजयासह टीम इंडियाने सेमी फायनलसाठी आपले आव्हान अधिक भक्कम केले आहे. संघाची गोलंदाजी आणि मधल्या फळीतील फलंदाजांची कामगिरी समाधानकारक असून, आगामी सामन्यांसाठी भारत मजबूत स्थितीत आहे.
