Himachal Pradesh : हिमाचल प्रदेशातील कुल्लूमध्ये एक धक्कादायक घटना समोर आली आहे. येथे मणिकरणजवळील तलावात एका विदेशी जोडप्याचे विवस्त्र मृतदेह आढळून आले आहेत. मृतदेहावर जखमांच्या काही खुणा होत्या. दोघेही रशियाचे नागरिक होते.
पोलिसांनी दोघांचेही मृतदेह ताब्यात घेऊन पोस्टमॉर्टमसाठी पाठवले आहेत. पोलिसांनी सांगितले की, तरुण आणि तरुणी दोघेही सुमारे 20 वर्षांचे असून त्यांची ओळख अद्याप पटलेली नाही. परंतु जवळपास आढळलेल्या काही समानतांवरून असे दिसते की पिडीत रशियाचे आहेत.
प्रथमदर्शनी हे आत्महत्येचे वाटत असले तरी हत्येची शक्यता नाकारता येत नाही, असे पोलिसांनी सांगितले. लोक याला खून असेही म्हणत आहेत. प्रत्यक्षदर्शींनी सांगितले की, शरीरावर धारदार शस्त्राने जखमेच्या अनेक खुणा आढळल्या आहेत.
मणिकरणपासून दोन किलोमीटर अंतरावर पार्वती नदीच्या काठावर असलेल्या तगारी येथील गरम पाण्याच्या तलावात तरुणीचा मृतदेह आढळून आला, तर तलावाबाहेर पुरुषाचा मृतदेह आढळून आला. काही लोकांनी हे मृतदेह पाहून पोलिसांना माहिती दिली.
सहाय्यक पोलिस अधीक्षक संजीव चौहान यांनी सांगितले की, तरुणाच्या हातावर व मानेवर जखमेच्या खुणा होत्या तर तरुणीच्या हातावर जखमेच्या खुणा होत्या. त्यांच्या जखमा जीवघेण्या नाहीत आणि मृत्यूचे कारण अद्याप समजू शकलेले नाही.
घटनास्थळावरून एक ब्लेड, एक मोबाईल फोन, इतर वस्तू आणि मादक पदार्थ (चरस) जप्त करण्यात आल्याचे पोलिसांनी सांगितले. प्रथमदर्शनी ही आत्महत्या असल्याचे दिसत असले तरी शवविच्छेदन अहवाल आल्यानंतर सर्व बाबी स्पष्ट होतील.
पोलिसांनी सांगितले की, मृतदेह पोस्टमॉर्टमसाठी कुल्लू प्रादेशिक रुग्णालयात पाठवण्यात आले तेथून ते मेडिकल कॉलेज, मंडी येथे पाठवण्यात आले. जोडप्याचे चेहरे सुजले होते आणि ते ओळखण्यापलीकडे होते. घटनास्थळी फॉरेन्सिक पथकांना पाचारण करण्यात आले असून पोलीस मृतांची माहिती गोळा करण्यासाठी हॉटेल, होमस्टे आणि इतर निवासस्थानांची तपासणी करत आहेत.