Indonesia : इंडोनेशियन बचाव कर्मचार्‍यांनी सोमवारी मारापी पर्वतावर ज्वालामुखीचा उद्रेक झाल्यानंतर 11 गिर्यारोहकांचे मृतदेह बाहेर काढले आणि किमान 12 जणांचा शोध सुरू आहे. पश्चिम सुमात्राच्या आगम प्रांतात असलेल्या माऊंट मारापी येथे रविवारी अचानक स्फोट झाल्याने आकाशात 3,000 मीटरपर्यंत राखेचा जाड थर पसरला आणि राखेचे ढग अनेक किलोमीटरपर्यंत पसरले.
शनिवारी सुमारे 75 गिर्यारोहकांनी 2,900 मीटर उंच पर्वतावर चढाई सुरू केली होती आणि ते अडकले आहेत. पडांग येथील स्थानिक शोध आणि बचाव एजन्सीचे अधिकारी हॅरी ऑगस्टियन यांनी सांगितले की, त्यापैकी आठ जणांना रविवारी रुग्णालयात दाखल करण्यात आले.
पश्चिम सुमात्राच्या शोध आणि बचाव संस्थेचे प्रमुख अब्दुल मलिक यांनी सांगितले की, बचावकर्त्यांनी सोमवारी सकाळी 11 गिर्यारोहकांचे मृतदेह बाहेर काढले. ते बेपत्ता लोकांचा शोध घेत आहेत. त्यांनी आणखी तीन जणांना वाचवले आहे.
ते म्हणाले, “मृतदेह आणि पीडितांना बाहेर काढण्याची प्रक्रिया सुरू आहे.” बचाव कर्मचारी अजूनही 12 बेपत्ता गिर्यारोहकांचा शोध घेत आहेत. पेडांग शोध आणि बचाव संस्थेचे प्रमुख अब्दुल मलिक यांनी सांगितले की, त्यांना तीन लोक जिवंत आणि 11 मृतदेह सापडले आहेत.
त्यांनी सांगितले की शनिवारी घटनेच्या दिवशी एकूण 75 गिर्यारोहक मेरापी पर्वतावर होते. ज्वालामुखीचा उद्रेक झाल्यानंतर पांढरी आणि राखाडी राख पसरली आहे. त्यामुळे गिर्यारोहक बेपत्ता असून आजूबाजूची अनेक गावे ज्वालामुखीच्या राखेने झाकली गेली आहेत.
मीडिया रिपोर्ट्सनुसार, ज्वालामुखीचा उद्रेक झाल्याच्या ठिकाणाजवळील डोंगरावर चढणे आणि दोन मार्ग आता बंद करण्यात आले आहेत. तसेच, ज्वालामुखीच्या मुखापासून 3 किलोमीटरपर्यंत उतारावर असलेली गावे खबरदारीचा उपाय म्हणून रिकामी करण्यात आली आहेत. स्फोटानंतर ज्वालामुखीतून लाव्हा बाहेर येण्याची शक्यता आहे.