Indore : मध्य प्रदेशातील इंदूरमध्ये रात्री बंद कॅफेला आग लावल्याप्रकरणी पोलिसांनी बुधवारी एका ७० वर्षीय वृद्धाला अटक केली. एका पोलीस अधिकाऱ्याने दिलेल्या माहितीनुसार, प्राथमिक चौकशीदरम्यान आरोपीने एक विचित्र दावा केला.
आरोपी म्हणाला, या कॅफेमध्ये सिगारेट ओढणाऱ्या मुलींचा त्याला खूप राग आला होता, त्यामुळे त्याने कॅफे जाळले. अतिरिक्त पोलिस उपायुक्त राजेश दंडोतिया यांनी सांगितले की, मंगळवारी रात्री लासुदिया पोलिस स्टेशन परिसरात एका कॅफेला आग लावणाऱ्या आरोपीची सीसीटीव्ही फुटेजवरून ओळख पटली असून त्याला अटक करण्यात आली आहे.
कॅफे बंद असताना जाळपोळीची घटना घडल्याचे त्यांनी सांगितले. आरोपीची ओळख न सांगता दंडोतिया यांनी सांगितले की, तो व्यक्ती ७० वर्षांचा असून तो दूरसंचार विभागाचा निवृत्त कर्मचारी आहे.
ते पुढे म्हणाले की, “आमच्या सुरुवातीच्या चौकशीत आरोपीने सांगितले की, या कॅफेमध्ये मुलींचे धूम्रपान करणे त्याला आवडत नाही, त्यामुळे त्याने रागाच्या भरात कॅफेला आग लावली.” मात्र, जाळपोळीच्या कारणाबाबत आरोपी वारंवार आपले म्हणणे बदलत आहे.
त्यामुळे संपूर्ण तपासानंतरच पोलीस याप्रकरणी कोणताही निष्कर्ष काढू शकतील, असे दंडोतिया यांनी सांगितले. अतिरिक्त पोलिस उपायुक्तांनी सांगितले की, आरोपींनी कॅफेला आग लावल्यानंतर ते पूर्णपणे जळून खाक झाले आणि या आगीमुळे त्या मालकाचे सुमारे 4 लाख रुपयांचे नुकसान झाले.
ते म्हणाले की, आरोपीविरुद्ध भारतीय दंड संहितेच्या कलम ४३६ (इमारत जाळण्याच्या उद्देशाने ज्वलनशील पदार्थाचा दुर्भावनापूर्ण वापर) अंतर्गत गुन्हा दाखल करण्यात आला आहे. अन्य एका पोलिस अधिकाऱ्याने सांगितले की, आगीचा बळी ठरलेल्या कॅफेच्या संचालकाने तपासकर्त्यांना सांगितले की आरोपी गेल्या अनेक दिवसांपासून त्याच्या आस पास फिरत होता.