dowry : केरळमधील तिरुवनंतपुरममध्ये एक हृदयद्रावक घटना घडली आहे. येथे हुंड्यासाठी मुलीने आत्महत्या केली आहे. वास्तविक, 26 वर्षीय तरुणी डॉक्टरने आत्महत्या केल्याचा आरोप आहे. कुटुंबीय हुंड्याची मागणी पूर्ण करू शकत नसल्याने प्रियकराने तिच्याशी लग्न करण्यास नकार दिला होता.
दरम्यान, केरळच्या आरोग्य मंत्री वीणा जॉर्ज यांनी बुधवारी एका तरुण महिला डॉक्टरच्या आत्महत्येची चौकशी करण्याचे आदेश दिले आहेत. माहितीनुसार, डॉ. शहाना 5 डिसेंबर रोजी तिरुअनंतपुरममधील एका अपार्टमेंटमध्ये मृतावस्थेत आढळून आली होती.
येथील शासकीय वैद्यकीय महाविद्यालयातील शस्त्रक्रिया विभागातील 26 वर्षीय पदव्युत्तर डॉक्टर शहाना या अपार्टमेंटमध्ये बेशुद्धावस्थेत आढळून आल्याचे पोलिसांनी सांगितले होते. त्यानंतर डॉक्टरांनी त्यांना रुग्णालयात नेले असता त्यांना मृत घोषित करण्यात आले.
दरम्यान, वैद्यकीय महाविद्यालय पोलीस ठाण्यात अनैसर्गिक मृत्यूची नोंद करून तपास सुरू केला असून, मृत डॉक्टरच्या नातेवाईकांचे जबाब नोंदवले आहेत. स्थानिक मीडिया रिपोर्ट्सनुसार, डॉ. शहाना तिची आई आणि दोन भावंडांसोबत राहत होती.
आखाती देशात काम करणाऱ्या तिच्या वडिलांचे दोन वर्षांपूर्वी निधन झाले. ती डॉ. ईए रुवैस यांच्यासोबत रिलेशनशिपमध्ये होती आणि दोघांनी लग्न करण्याचा निर्णय घेतला.
पोलिसांनी या प्रकरणी जास्त माहिती दिली नाही पण सूत्रांनी दिलेल्या माहितीनुसार अपार्टमेंटमध्ये एक ‘सुसाईड नोट’ सापडली आहे ज्यावर पीडितेने लिहिले होते की, ‘प्रत्येकाला फक्त पैसे हवे आहेत.’
मृताच्या कुटुंबीयांच्या जवळच्या लोकांनी आरोप केला की शहाना नैराश्यात होती कारण तिचा मित्र, डॉक्टर, हुंड्याचे कारण देत लग्नापासून दूर गेला होता. एका स्थानिक नगरसेवकाने आरोप केला की शहानाचे कुटुंब हुंडा देण्यास तयार होते, परंतु नंतर वराच्या कुटुंबाने मोठ्या रकमेची मागणी केली, जी मुलीचे कुटुंब देऊ शकले नाही.
कौन्सिलरने आरोप केला की, ‘मुलाच्या कुटुंबीयांनी हुंडा म्हणून मोठ्या रकमेची मागणी केली आणि नंतर लग्नापासून माघार घेतली. डॉ.शहाना यामुळे डिप्रेशनमध्ये होती. राज्य महिला आयोगाच्या अध्यक्षा पी सतीदेवी यांनी शहाना यांच्या जवळच्या वेंजरामुडू येथील घरी जाऊन तिच्या आईचे सांत्वन केले.
डॉ. रुवैस यांच्या कुटुंबीयांनी हुंडा म्हणून 150 ग्रॅम सोने, 15 एकर जमीन आणि बीएमडब्ल्यू कारची मागणी केल्याचा आरोप शहाना यांच्या कुटुंबीयांनी केला आहे.
स्थानिक वृत्तपत्र मातृभूमीच्या वृत्तानुसार, जेव्हा डॉ. शहानाच्या कुटुंबीयांनी सांगितले की ते मागणी पूर्ण करू शकत नाहीत, तेव्हा तिच्या प्रियकराच्या कुटुंबाने लग्न रद्द केले. यामुळे तरुणी डॉक्टर अस्वस्थ झाली आणि तिने आत्महत्या केल्याचा आरोप स्थानिक नागरिकांनी केला आहे.