भरधाव वेगाने येणाऱ्या कंटेनरने रिक्षाला जोरदार धडक दिल्याची घटना बीडमध्ये घडली आहे. यामुळे एकच खळबळ उडाली आहे. या अपघातात आईसह दोन मुलांचा जागीच मृत्यू झाला आहे. तसेच एकजण गंभीर जखमी झाला आहे.
रात्रीच्या सुमारास हा अपघात झाला आहे. बीड -परळी महामार्गावरील बकरवाडी फाट्याजवळ ही घटना घडली. बीड शहरातील अजीम शेख हे आपल्या पत्नी व दोन मुलासह सकाळी थेटे गव्हाण (ता. धारूर) येथे आपल्या सासरवाडीला गेले होते.
रात्री घरी येत असताना हा अपघात झाला. बकरवाडी फाटा येथे समोरून येत असलेल्या कंटेनरवरील आपला ताबा सुटला. तो थेट रिक्षावर गेला. यामध्ये नसरीन अजीम शेख (वय 35), नोमान अजीम शेख (वय 13) आणि अदनान अजीम शेख (वय 12) अशी मृत्युमुखी पडलेल्या माय-लेकरांची नावे आहेत.
तसेच रिक्षाचालक अजीम शेख गंभीर जखमी झाला आहे. त्यांच्यावर हॉस्पिटलमध्ये उपचार सुरु आहे. हा अपघात इतका भीषण होता की यामध्ये रिक्षाचा अक्षरशा चुराडा झाला. याप्रकरणी पोलिसांनी कंटेनरचालकाविरोधात गुन्हा दाखल केला असून अधिकचा तपास सुरू आहे.
दरम्यान, सासुरवाडीवरून येणाऱ्या कुटुंबावर काळाने घाला घातल्याने परिसरातून मोठी हळहळ व्यक्त होत आहे. एक सर्वसामान्य कुटूंब असल्याने सर्वांनी आक्रोश केला. याबाबत पोलीस तपास करत आहेत.
दरम्यान, हा अपघात रात्रीच्या 9 वाजता झाला. यानंतर यंत्रणा लगेच कामाला लागली. जखमींना लगेच रुग्णालयात दाखल करण्यात आले. यावेळी रोडवर मोठी गर्दी झाली होती.