Uddhav Thackeray : राज्यात सध्या “ऑपरेशन टायगर” जोरात सुरू असल्याच्या चर्चा आहेत. अशातच शिवसेना (शिंदे गट) महाविकास आघाडीतील नेत्यांना आपल्या गोटात खेचण्यात यशस्वी ठरत आहे. काही दिवसांपूर्वी पुण्यात माजी काँग्रेस आमदार रवींद्र धंगेकर यांनी काँग्रेसला रामराम करत शिंदे गटात प्रवेश केला. त्यानंतर आता पिंपरी चिंचवडमधील फायरब्रँड नेत्या सुलभा उबाळे यांनीही ठाकरे गटाचा निरोप घेत शिंदे गटात सामील होण्याचा निर्णय घेतला आहे.
मुंबईत उपमुख्यमंत्री एकनाथ शिंदे यांच्या उपस्थितीत सुलभा उबाळे यांचा पक्षप्रवेश पार पडला. यावेळी त्यांचे पुत्र अजिंक्य उबाळे यांनीही शिंदे गटात प्रवेश केला. या कार्यक्रमाला मावळचे खासदार श्रीरंग बारणे आणि पिंपरी चिंचवड शहर प्रमुख निलेश तरस उपस्थित होते.
शिंदे गटाचा पिंपरी चिंचवडमध्ये प्रभाव वाढणार
सुलभा उबाळे यांनी पक्ष सोडण्यामागचे कारण स्पष्ट करताना सांगितले की, विधानसभा निवडणुकीत शहरातील तिन्ही मतदारसंघ पक्षाने सोडून दिल्यामुळे शहरात ठाकरे गटाचे अस्तित्वच उरले नाही. पक्षनेतृत्व शहराकडे दुर्लक्ष करत असल्याने काम करण्यासाठी संधीच शिल्लक उरली नाही, असे त्यांनी स्पष्ट केले.
सुलभा उबाळे यांच्या प्रवेशामुळे शिंदे गटाची ताकद पिंपरी चिंचवडमध्ये वाढणार असून, आगामी महापालिका निवडणुकीत त्याचा मोठा फायदा होऊ शकतो.
सुलभा उबाळेंची राजकीय कारकीर्द
- 1992: शिवसेना शाखा प्रमुख म्हणून राजकारणात प्रवेश.
- 1997: नगरसेविका म्हणून निवड.
- 1998: पिंपरी चिंचवड महापालिकेच्या विरोधी पक्षनेत्या पदाची जबाबदारी.
- 2007-2012: शिवसेना गटनेता आणि स्थायी समिती सदस्य म्हणून कार्य.
- 2009: भोसरी विधानसभा निवडणुकीत अवघ्या 1272 मतांनी पराभव.
- 2014: पुन्हा भोसरी विधानसभा निवडणुकीत पराभव.
- 2014-2017: शिवसेना गटनेत्या म्हणून काम.
- 2017-पुढे: जिल्हा संघटिका म्हणून कार्यरत.
शिंदे गटाच्या पक्षबांधणीला वेग
शिंदे गटाने महाविकास आघाडीच्या नेत्यांना आपल्या गोटात आणण्याचे धोरण अवलंबले असून, सुलभा उबाळे यांचा प्रवेश पिंपरी चिंचवडमध्ये शिंदे गटासाठी मोठा राजकीय फायदा ठरू शकतो. आगामी निवडणुकांच्या पार्श्वभूमीवर या पक्षप्रवेशामुळे शिंदे गटाच्या ताकदीत आणखी भर पडणार असल्याचे राजकीय विश्लेषकांचे मत आहे.