Saif Ali Khan : अभिनेता सैफ अली खानवर हल्ला झाल्यानंतर, त्याला लीलावती रुग्णालयात दाखल करणाऱ्या रिक्षाचालक भजन सिंह राणाचा सोशल मीडिया इन्फ्लूएन्सर फैजान अंसारी याने सन्मान केला आणि आर्थिक मदत दिली. फैजान अंसारीने भजन राणाला ११ हजार रुपये इनाम म्हणून दिले आणि त्याचा सत्कार केला.
भजन सिंह राणाने याबद्दल सांगितले की, त्याला कधीही असं वाटलं नव्हतं की त्याला अशी सन्मानाची संधी मिळेल. त्याने पुढे सांगितले की, “माझ्या मदतीमुळे चांगलं काहीतरी घडलं, हे मला खूप समाधान देतं. रक्ताच्या थारोळ्यातील व्यक्तीला पाहिल्यावर अनेक लोक घाबरतात, मला देखील थोडा वेळ भीती वाटली, पण नंतर मदतीचा विचार केला आणि पुढे आलो. आज मी याचा अभिमान बाळगतो.”
सैफ अली खानबद्दल बोलताना, राणाने सांगितले की, “सैफ अली खान(Saif Ali Khan) स्वतःच रुग्णालयात गेले, ते खूप धाडसी आहेत. गंभीर जखमी असूनही त्यांनी हिंमत दाखवली.” प्रसिद्धीमध्ये आल्यावर भजन राणाच्या जीवनशैलीत मोठे बदल आले आहेत, त्यांनी सांगितले की, ते सध्या रिक्षा चालवू शकत नाहीत कारण त्यांना मुलाखती देण्याची आवश्यकता आहे.
फैजान अंसारीने भजन सिंह राणाला ‘रिअल हिरो’ संबोधले आणि सांगितले की, “रात्री तीन वाजता भजन सिंह यांनी धाडस दाखवून रक्ताच्या थारोळ्यातील अभिनेत्याला रुग्णालयात पोचवले. अशा परिस्थितीत इतर लोक घाबरले असते, पण भजन सिंह यांनी साहस दाखवून हे काम केले.” फैजानचा हा विश्वास आहे की, भजन राणा हे खरे नायक आहेत.