Santosh Deshmukh murder : अशानं भिकेला लागू! संतोष देशमुखला धडा शिकवा! वाल्मीक कराडचे आदेश; ‘मोकारपंती’ वरील ‘ते’ VIDEO CIDच्या हाती
Santosh Deshmukh murder : मस्सागावचे सरपंच संतोष देशमुख यांच्या हत्या प्रकरणात सीआयडीने महत्त्वपूर्ण पुरावे सादर करत आरोपपत्र दाखल केले आहे. या आरोपपत्रात वाल्मिक कराडला हत्येचा मुख्य सूत्रधार म्हणून नमूद करण्यात आले आहे. कराडनेच संतोष देशमुख यांची हत्या घडवून आणण्यासाठी आदेश दिले होते, असे पुरावे तपास यंत्रणेकडे असल्याचे स्पष्ट झाले आहे.
हत्येचा कट आणि आदेश
सीआयडीच्या अहवालानुसार, कराड आणि सुदर्शन घुले यांच्यातील संभाषणात हत्येचा कट रचल्याचा उल्लेख आहे. “खंडणीत आड येणाऱ्याला संपवा, संतोषलाही धडा शिकवा,” असे आदेश कराडने घुलेला दिले होते. तसेच, “तो अडथळा ठरेल, त्यामुळे आपण भिकेला लागू,” असेही कराडने सांगितले होते. यानंतर, घुलेने विष्णू चाटेशी संपर्क साधला आणि चाटेने देशमुख यांना थेट जीवे मारण्याची धमकी दिली.
अपहरण आणि निर्घृण हत्या
७ डिसेंबर २०२४ रोजी हा कट रचण्यात आला आणि ९ डिसेंबरला दुपारी ३:२० वाजता संतोष देशमुख यांचे अपहरण करण्यात आले. त्यानंतर त्यांना ८-९ किलोमीटर दूर नेत अमानुषपणे मारहाण करून ठार मारण्यात आले. हत्येच्या काही वेळ आधीच आरोपींनी एका व्हॉट्सअ‍ॅप ग्रुपवर (मोकारपंती) व्हिडीओ कॉल केला आणि देशमुख यांच्यावर होणारी मारहाण काही अल्पवयीन मुलांनी पाहिली. या व्हिडीओच्या माध्यमातून पोलिसांना महत्त्वाचा डिजिटल पुरावा मिळाला आहे.
कराड टोळीची जिल्ह्यात दहशत
सीआयडीच्या आरोपपत्रात कराड टोळीच्या दहशतीचा सविस्तर उल्लेख आहे. या टोळीने अनेकांना धमकावून खंडणी वसूल केली असून, परळी, अंबाजोगाई, केज आणि धारूर या भागांमध्ये त्यांच्या गुन्हेगारी वर्चस्वाचा प्रभाव आहे. अनेकांनी तक्रारी केल्या असल्या तरी, टोळीतील सदस्य जामिनावर सुटल्यावर तक्रारदारांना पुन्हा त्रास देत असल्याचे आढळले आहे. त्यामुळे अनेक पीडित व्यक्तींनी पुढे येण्याचे धाडसही केले नाही.
या प्रकरणात खंडणी, अ‍ॅट्रॉसिटी आणि हत्या अशा गंभीर आरोपांचा समावेश असून, सीआयडीने ठोस पुराव्यांसह न्यायालयात आरोपपत्र दाखल केले आहे. आता या गुन्ह्याचा पुढील तपास आणि न्यायालयीन प्रक्रिया कशी पुढे जाते, याकडे संपूर्ण जिल्ह्याचे लक्ष लागले आहे.
