Dhananjay Munde : बीड जिल्ह्यातील मस्साजोग गावचे सरपंच संतोष देशमुख यांचे अपहरण व हत्या प्रकरण गाजत आहे. या प्रकरणात प्रमुख आरोपी वाल्मिक कराड आणि त्याची टोळी पोलिस कोठडीत आहे. मात्र, कराड यांचा राष्ट्रवादी काँग्रेसचे नेते आणि माजी मंत्री धनंजय मुंडे यांच्याशी जवळचा संबंध असल्याचा आरोप करण्यात आला आहे. त्यामुळे विरोधक आणि सामाजिक कार्यकर्त्या अंजली दमानिया यांनी धनंजय मुंडे यांनाही सहआरोपी करण्याची मागणी केली आहे.
2007 मधील FIR पुन्हा चर्चेत
या दरम्यान 2007 मध्ये झालेल्या एका गुन्ह्यात धनंजय मुंडे आणि वाल्मिक कराड दोघांचं नाव असल्याचा एक FIR सोशल मीडियावर व्हायरल होत आहे. बीड जिल्ह्यात मोठ्या प्रमाणावर हा FIR शेअर केला जात असून, धनंजय मुंडे आणि वाल्मिक कराड यांनी एकत्र गुन्हे केले आहेत, याचा हा मोठा पुरावा असल्याचा दावा अंजली दमानिया यांनी केला आहे.
अंजली दमानियांचा गंभीर आरोप
अंजली दमानिया यांनी सांगितलं की, धनंजय मुंडे हे स्वतः गुन्हेगारी टोळीचा भाग होते. या FIR मध्ये स्पष्ट उल्लेख आहे की, 2007 मध्ये झालेल्या एका प्रकरणात मुंडे आणि कराड यांच्या नेतृत्वाखाली 25 लोकांनी एका व्यक्तीला गाडीसह जाळण्याचा प्रयत्न केला होता.
“या FIR मध्ये धनंजय मुंडे स्वतः गाडी पेटवण्याचा आदेश देताना दिसतात, तर वाल्मिक कराड गाडीचा दरवाजा बंद करतो. आरोपींनी रॉकेल टाकून गाडी पेटवली आणि पीडिताला ठार मारण्याचा प्रयत्न केला. मात्र, काही काळानंतर धनंजय मुंडे यांचं नाव या प्रकरणातून वगळण्यात आलं, ही बाब संशयास्पद आहे,” असं दमानिया यांनी सांगितलं.
सोशल मीडियावर FIR व्हायरल
बीड जिल्ह्यात 18 एप्रिल 2007 च्या घटनेचा FIR मोठ्या प्रमाणावर शेअर केला जात आहे. या FIR मध्ये स्पष्टपणे धनंजय मुंडे आणि वाल्मिक कराड हे दोघं आरोपी होते, असं नमूद करण्यात आलं आहे. मात्र, नंतर मुंडे यांचं नाव काढून टाकण्यात आलं, असा आरोप केला जात आहे.
2007 मधील गुन्ह्याचा घटनाक्रम
- घटना: 18 एप्रिल 2007, परळीतील सांस्कृतिक सभागृह
- घडलेला प्रकार: भंगार लिलावादरम्यान गोंधळ, स्कॉर्पिओ गाडी जाळण्याचा प्रयत्न
- तक्रार: किशोर श्रीरंग फड यांनी परळी पोलिसांत दिली
- आरोप: धनंजय मुंडे, रामेश्वर मुंडे, वाल्मिक कराड आणि 25 साथीदारांनी गाडी पेटवली
- पीडित: किशोर फड आणि त्यांचा ड्रायव्हर बालाजी घुले
- गंभीर आरोप: रॉकेल टाकून गाडी पेटवण्याचा प्रयत्न, गोळीबाराची धमकी
या प्रकरणात पुढे काय?
अंजली दमानिया यांनी मुंडे आणि कराड यांच्यावर पूर्वीचे सर्व डिस्पोज झालेले गुन्हे पुन्हा सुरू करण्याची मागणी केली आहे. तसेच, या प्रकरणात न्यायालयीन समितीने हस्तक्षेप करून सखोल चौकशी करावी, अशी मागणी केली जात आहे.
धनंजय मुंडे यांचं स्पष्टीकरण अद्याप नाही
या गंभीर आरोपांवर अद्याप धनंजय मुंडे यांनी कोणतंही स्पष्टीकरण दिलेलं नाही. मात्र, BJP आणि इतर विरोधी पक्षांनी मुंडेंना या प्रकरणात सहआरोपी करण्याची मागणी लावून धरली आहे. आता पाहावं लागेल की ही केस पुढे काय वळण घेते.