Dhananjay Munde : धनंजय मुंडेंवर खुनाचा गुन्हा दाखल करा! जरांगे आक्रमक, धनंजय देशमुखांची भेट घेतली, देशमुखांना अश्रू अनावर
Dhananjay Munde : बीडच्या मस्साजोग येथे मनोज जरांगे पाटील यांनी आज (४ फेब्रुवारी) धनंजय देशमुख यांची भेट घेतली. या भेटीदरम्यान धनंजय देशमुख भावनावश झाले, तर मनोज जरांगे यांनी सरकारवर तीव्र शब्दांत नाराजी व्यक्त केली. मंत्री धनंजय मुंडेंवर हत्या (कलम ३०२) अंतर्गत गुन्हा दाखल करावा, अशी मागणी त्यांनी केली. “ही टोळी राज्यातून संपवावी लागेल. धनंजय मुंडेंना आमदारकी आणि मंत्रीपदावरून हाकलून द्या,” असे आक्रमक वक्तव्य त्यांनी यावेळी केले.
संतोष देशमुख यांची क्रूर हत्या आणि धक्कादायक पुरावे
मस्साजोगचे सरपंच संतोष देशमुख यांची अत्यंत क्रूर पद्धतीने हत्या करण्यात आली. आरोपींनी अमानुष मारहाण करत या हत्येचे चित्रणही केले होते. तपासादरम्यान व्हॉट्सअॅप कॉल आणि व्हिडिओ फॉरेन्सिक अहवाल सीआयडीकडे सुपूर्द करण्यात आला. यातील दहा ते बारा छोटे व्हिडिओ फॉरेन्सिक तपासणीसाठी वापरण्यात आले, आणि त्यातून आरोपींची ओळख पटली.
धनंजय देशमुख यांचा सरकारवर आरोप
संतोष देशमुख यांच्या हत्या प्रकरणाचे फोटो समाजमाध्यमांवर व्हायरल झाल्यानंतर धनंजय देशमुख यांना मानसिक धक्का बसला. त्यांनी माध्यमांना या फोटो हटवण्याची विनंती केली. यावेळी त्यांनी सरकारवर गंभीर आरोप करत म्हटले की, “या प्रकरणात १५०-२०० लोक सहभागी आहेत. सरकारला सर्व काही माहिती आहे, पण कोणाला वाचवण्याचा प्रयत्न केला जातोय, हे महाराष्ट्राच्या जनतेला ठाऊक आहे. मारेकऱ्यांना नियती माफ करणार नाही.”
राजकीय हालचालींना वेग, धनंजय मुंडेंच्या राजीनाम्याची शक्यता वाढली
या प्रकरणानंतर राज्यातील राजकीय वातावरण अधिक तापले आहे. काल (३ फेब्रुवारी) देवगिरी बंगल्यावर मुख्यमंत्री देवेंद्र फडणवीस आणि उपमुख्यमंत्री अजित पवार यांच्यात महत्त्वाची बैठक झाली. यामध्ये धनंजय मुंडे यांचा राजीनामा घेतला जाणार असल्याची चर्चा रंगली आहे.
आता सरकार काय भूमिका घेणार?
संतोष देशमुख हत्या प्रकरणामुळे सरकारवर प्रचंड दबाव वाढला असून, मनोज जरांगे यांची आक्रमक भूमिका आणि मुंडेंवर ३०२ अंतर्गत गुन्हा दाखल करण्याची मागणी सरकार स्वीकारते का, हे पाहणे महत्त्वाचे ठरणार आहे.
