Chhava : छावा सिनेमात छत्रपती शिवाजी महाराजांचा आवाज कोणत्या अभिनेत्याने दिला?, नाव ऐकून चकीत व्हाल
Chhava : ऐतिहासिक वारसा साकारत आणि प्रेक्षकांच्या मनावर गारुड घालत, ‘छावा’ चित्रपटाने बॉक्स ऑफिसवर विक्रमी यश मिळवले आहे. छत्रपती संभाजी महाराज यांच्या अद्वितीय पराक्रमावर आधारित या चित्रपटाने 300 कोटींच्या घरात दमदार कमाई केली आहे. विकी कौशल यांनी छत्रपती संभाजी महाराजांची भूमिका प्रभावीपणे साकारली असून, महाराणी येसूबाईंच्या भूमिकेत रश्मिका मंदाना झळकल्या आहेत. मात्र, या चित्रपटात आणखी एक महत्त्वाचा पैलू प्रेक्षकांचे विशेष लक्ष वेधून घेत आहे.
शिवरायांचा आवाज कोणी दिला? प्रेक्षकांची उत्सुकता संपली!
‘छावा’ चित्रपटात छत्रपती शिवाजी महाराज थेट दृश्य स्वरूपात नसले तरी, त्यांची उपस्थिती संपूर्ण चित्रपटभर जाणवते. विशेषतः शिवराय आणि संभाजी महाराज यांच्यातील संवाद प्रेक्षकांच्या मनाचा ठाव घेतात. चित्रपटात काही ठिकाणी बाल शंभूराजे आईसाहेब आणि आबासाहेबांना साद घालताना दिसतात, तेव्हा मार्गदर्शन करणारा शिवरायांचा आवाज ऐकू येतो.
या आवाजाबद्दल अनेक तर्क-वितर्क लावले जात होते. तो आवाज कोणी दिला? कुठल्या अभिनेत्याने किंवा डबिंग आर्टिस्टने हा प्रभावी आवाज दिला? या प्रश्नांची चर्चा रंगली. अखेर या गूढाचा उलगडा झाला असून, हा आवाज दिला आहे खुद्द दिग्दर्शक लक्ष्मण उतेकर यांनी!
लक्ष्मण उतेकर – एक उत्कृष्ट दिग्दर्शक आणि प्रभावी व्हॉइस आर्टिस्ट!
डबिंग आर्टिस्ट विजय विक्रम यांनी इन्स्टाग्रामवर माहिती शेअर करत हा खुलासा केला. ‘छावा’ चित्रपटात शिवरायांचा प्रभावी आवाज कोण्या प्रसिद्ध अभिनेत्याने नव्हे, तर दिग्दर्शक लक्ष्मण उतेकर यांनी स्वतःच दिला आहे. चित्रपट पाहताना हे सहज लक्षात येत नाही, मात्र त्यांच्या भारदस्त आवाजामुळे चित्रपटातील शिवरायांचे अस्तित्व अधिक प्रभावीपणे जाणवते.
‘छावा’ची ऐतिहासिक कमाई – 400 कोटींच्या पुढे वाटचाल!
165 कोटी रुपयांच्या बजेटमध्ये तयार झालेल्या ‘छावा’ने देशभरात प्रचंड प्रतिसाद मिळवला आहे. केवळ भारतातच नव्हे, तर जागतिक स्तरावरही या चित्रपटाने 400 कोटींपेक्षा जास्त गल्ला गोळा केला आहे. ऐतिहासिक चित्रपट कसा असावा, याचा आदर्श उदाहरण म्हणून ‘छावा’ला ओळख मिळत आहे.
या चित्रपटाने छत्रपती संभाजी महाराज यांच्या शौर्यगाथेला नवीन उंची दिली असून, प्रेक्षकांसाठी हा चित्रपट केवळ मनोरंजन नसून एक ऐतिहासिक प्रेरणा ठरली आहे.
