Morne Morkel : टीम इंडियाच्या सदस्यावर कोसळला दु:खाचा डोंगर, आईच्या निधनाची बातमी कळताच तातडीने दुबईहून भारताकडे रवाना
Morne Morkel : भारतीय संघाने चॅम्पियन्स ट्रॉफी 2025 मध्ये सेमी फायनलमध्ये प्रवेश निश्चित केला आहे. सध्या टीम इंडिया ग्रुप स्टेजच्या अखेरच्या सामन्यात न्यूझीलंडविरुद्ध खेळत असताना, संघातील एक महत्त्वाचा सदस्य भारतात परतला आहे. संघ व्यवस्थापक आर देवराज यांच्या आईचे निधन झाल्याने त्यांनी स्पर्धा अर्धवट सोडून हैदराबादला परतण्याचा निर्णय घेतला आहे.
हैदराबाद क्रिकेट असोसिएशनने दिली माहिती
हैदराबाद क्रिकेट असोसिएशनने (HCA) अधिकृत निवेदन जारी करून ही माहिती दिली. HCA ने आपल्या निवेदनात म्हटले आहे, “आमच्या सचिव आर देवराज यांच्या आई कमलेश्वरी गरू यांचे दुःखद निधन झाले आहे. या कठीण प्रसंगी आम्ही त्यांच्या आणि त्यांच्या कुटुंबाच्या दुःखात सहभागी आहोत. त्यांच्या आत्म्यास शांती लाभो.”
देवराज पुन्हा संघात सहभागी होणार का?
देवराज यांनी हैदराबादला परतण्याचा निर्णय घेतला असला तरी, ते पुन्हा दुबईला संघात परततील की नाही याबाबत निश्चितता नाही. क्रिकबझच्या अहवालानुसार, भारतीय संघाचा सेमी फायनलचा सामना झाल्यानंतर हा निर्णय घेतला जाणार आहे.
यापूर्वीही टीम इंडियाच्या सदस्यावर शोककळा
चॅम्पियन्स ट्रॉफीच्या सुरुवातीला भारतीय संघाचे गोलंदाजी प्रशिक्षक मॉर्ने मॉर्कल यांच्या वडिलांचे निधन झाले होते. त्यामुळे त्यांना दक्षिण आफ्रिकेत मायदेशी परतावे लागले होते. मात्र, मॉर्कल पुन्हा संघात सामील झाले. देवराज यांच्या बाबतीतही असेच होईल का, हे अद्याप स्पष्ट नाही.
संघ व्यवस्थापकाची भूमिका महत्त्वाची
भारतीय संघाच्या प्रत्येक मोठ्या दौऱ्यासाठी वेगळा व्यवस्थापक नियुक्त केला जातो. संघातील शिस्त, प्रशिक्षक आणि खेळाडू यांच्यातील समन्वय, लॉजिस्टिक्स आणि व्यवस्थापनाची जबाबदारी व्यवस्थापकाच्या खांद्यावर असते. त्यामुळे देवराज यांच्या अनुपस्थितीत संघ व्यवस्थापन कसे होणार, याकडे सर्वांचे लक्ष असेल.
टीम इंडियाच्या पुढील प्रवासाकडे लक्ष
भारतीय संघाने सेमी फायनलमध्ये प्रवेश केला असला तरी, आता देवराज पुन्हा संघात परतणार की नाही आणि संघ व्यवस्थापन त्यांच्याविना कसे सांभाळले जाईल, याकडे क्रिकेटप्रेमींचे लक्ष राहणार आहे.
