Swargate : स्वारगेट अत्याचारातील नराधमाला रात्री १ वाजता थरारक अटक, ‘अशा’ आवळल्या गाडेच्या मुसक्या

Swargate : पुण्यातील स्वारगेट बसस्थानकात घडलेल्या एका धक्कादायक घटनेने संपूर्ण शहर हादरले आहे. शिवशाही बसमध्ये एका २६ वर्षीय तरुणीवर अत्याचार करण्यात आल्याची घटना समोर आली आहे. विशेष म्हणजे, हा गुन्हा करणारा आरोपी सराईत गुन्हेगार असून, तो मध्यरात्रीपासून बसस्थानकाच्या आवारात फिरत होता.

या घटनेनंतर लोकांमध्ये तीव्र संताप उसळला. पोलिसांनी तत्काळ शोधमोहीम राबवली, मात्र आरोपी सापडत नसल्याने नागरिकांनी पोलिसांवर टीका केली. अखेर, शर्थीचे प्रयत्न केल्यानंतर आरोपीला पकडण्यात यश आले.

ऊसाच्या शेतात लपलेला आरोपी अखेर जाळ्यात

गेल्या काही तासांपासून पोलिस आरोपीचा शोध घेत होते. अखेर, गुणाट गावातील ऊसाच्या शेतात लपून बसलेल्या दत्तात्रय गाडे या आरोपीला ड्रोनच्या मदतीने शोधण्यात आले. मात्र, रात्रीच्या अंधारामुळे शोधमोहीम अधिक कठीण झाली. अखेर, मध्यरात्री दीडच्या सुमारास पोलिसांनी त्याला ताब्यात घेतले आणि पुण्यात आणले.

१३ पथकांचा शोध आणि पोलिसांवरील प्रश्नचिन्ह

आरोपीला शोधण्यासाठी पोलिसांनी तब्बल १३ पथकं तैनात केली होती. पुणे ग्रामीण पोलिसांचा मोठा फौजफाटा गावात दाखल झाला होता. मात्र, गुन्हा घडल्यानंतर बराच वेळ आरोपी फरार असल्याने पोलिसांच्या कार्यक्षमतेवर प्रश्न उपस्थित करण्यात आले.

आज न्यायालयात हजर

अटक झाल्यानंतर आरोपीला आज कोर्टात हजर करण्यात येणार आहे. राज्याचे मंत्री योगेश कदम यांनी या प्रकरणावर भाष्य करत स्वारगेट बसस्थानकातील खासगी सुरक्षारक्षकांवर जबाबदारी टाकली आहे.

या घटनेमुळे महिलांच्या सुरक्षेचा गंभीर प्रश्न निर्माण झाला असून, पुण्यात नागरिकांमध्ये भीती आणि रोषाचे वातावरण आहे.