Israel-Hamas war : इस्रायल आणि हमास यांच्यातील युद्धाबाबत अमेरिकेचे राष्ट्राध्यक्ष जो बिडेन यांनी मोठा दावा केला आहे. जो बिडेन म्हणाले की, भारतीय मध्य पूर्व युरोप कॉरिडॉरची घोषणा नुकतीच नवी दिल्लीत झालेल्या G-20 शिखर परिषदेदरम्यान करण्यात आली.
मला विश्वास आहे की ही घोषणा हमासने इस्रायलवर केलेल्या दहशतवादी हल्ल्याचे एक कारण आहे. अमेरिकेचे अध्यक्ष जो बिडेन म्हणाले की, त्यांचा देश चीनच्या बेल्ट अँड रोड इनिशिएटिव्ह (BRI) चा मुकाबला करण्यासाठी G7 सदस्य देशांसोबत काम करत आहे, ज्यात पायाभूत सुविधा प्रकल्पांच्या नेटवर्कद्वारे सौदी अरेबियाला युरोपशी जोडणारा रेल्वे-रोड प्रकल्प असायचा.
ते म्हणाले “मला खात्री आहे की हमासच्या हल्ल्याचे हे एक कारण आहे.” माझ्याकडे याचा कोणताही पुरावा नाही, परंतु माझा अंतरात्मा मला सांगतो की हमासने इस्रायलसाठी प्रादेशिक एकात्मतेच्या दिशेने काम केल्यामुळे हा हल्ला केला. आम्ही ते काम सोडू शकत नाही.
7 ऑक्टोबर रोजी हमासने इस्रायलवर हल्ला केला. या हल्ल्यात 1400 लोकांचा मृत्यू झाला आहे. अमेरिका आणि ब्रिटनसह अनेक देशांतील नागरिकांचाही यामध्ये समावेश आहे. या हल्ल्यानंतर दुसऱ्यांदा बिडेन यांनी भारतीय मध्य पूर्व युरोप कॉरिडॉरचा उल्लेख हमासच्या हल्ल्यामागील संभाव्य कारणांपैकी एक म्हणून केला आहे.
वास्तविक, सप्टेंबरमध्ये भारतात G20 शिखर परिषद आयोजित करण्यात आली होती. बिडेन, ऋषी सुनक यांच्यासह जगभरातील अनेक बडे नेते यात सहभागी झाले होते. या शिखर परिषदेच्या वेळी, पंतप्रधान मोदी, जो बिडेन यांच्यासह अनेक नेत्यांनी महत्त्वाकांक्षी भारतीय मध्य पूर्व युरोप कॉरिडॉरच्या बांधकामाची घोषणा केली होती.
अमेरिकेत आलेले ऑस्ट्रेलियन पंतप्रधान अँथनी अल्बानीज यांच्यासमवेत पत्रकारांना संबोधित करताना बिडेन म्हणाले, आम्ही याच्याशी (बेल्ट अँड रोड इनिशिएटिव्ह) स्पर्धा करणार आहोत आणि आम्ही ते वेगळ्या पद्धतीने करत आहोत.
बेल्ट अँड रोड इनिशिएटिव्ह कर्जाच्या ओझ्याखाली दबला आहे आणि त्यावर स्वाक्षरी केलेल्या बहुतेक राष्ट्रांसाठी तो फास बनला आहे. ते म्हणाले की त्या देशांसाठी पायाभूत सुविधा उपलब्ध करून देण्यासाठी ते G7 देशांसोबत काम करत आहेत.
G7 मध्ये ब्रिटन, कॅनडा, फ्रान्स, जर्मनी, इटली, जपान आणि अमेरिका यांचा समावेश आहे. भारत, युरोपियन युनियन, अमेरिका आणि सौदी अरेबिया… हे चार देश एकत्रितपणे एका मेगा प्रोजेक्टवर काम करत आहेत.
भारत-मध्य-पूर्व-युरोप इकॉनॉमिक कॉरिडॉर म्हणजेच IMEC असे त्याचे नाव आहे. याला ऐतिहासिक करार म्हटले जात आहे. या प्रकल्पासाठी 9 सप्टेंबर रोजी सामंजस्य करार करण्यात आला. भारताव्यतिरिक्त स्वाक्षरी करणाऱ्या देशांमध्ये अमेरिका, सौदी अरेबिया, संयुक्त अरब अमिराती, युरोपियन युनियन, इटली, फ्रान्स आणि जर्मनी यांचा समावेश आहे.
या कॉरिडॉरच्या उभारणीनंतर भारताला केवळ रेल्वे आणि जहाजानेच युरोप गाठता येणार आहे. हा कॉरिडॉर चीनच्या बेल्ट अँड रोड इनिशिएटिव्हला (बीआरआय) उत्तर मानले जात आहे.
या कॉरिडॉरचे दोन भाग असतील. पहिला- ईस्टर्न कॉरिडॉर, जो भारताला आखाती देशांशी जोडेल. दुसरा- नॉर्दर्न कॉरिडॉर, जो आखाती देशांना युरोपशी जोडेल. रेल्वे मार्गाबरोबरच या कॉरिडॉरमध्ये वीज केबल, हायड्रोजन पाइपलाइन आणि हाय-स्पीड डेटा केबल देखील असेल.