Uddhav Thackeray : पुण्यात जयपूर डायलॉग्ज या कार्यक्रमात बोलताना भाजप नेते आणि महाराष्ट्राचे उपमुख्यमंत्री देवेंद्र फडणवीस यांनी पुन्हा एकदा उद्धव ठाकरे यांच्यावर गंभीर आरोप केले. अडीच-अडीच वर्षे मुख्यमंत्रिपद वाटून घेण्याच्या मागणीवरून शिवसेनेने भाजपसोबत केलेली युती तोडली, असा दावा त्यांनी केला.
अडीच वर्षांसाठी मुख्यमंत्रिपदाची मागणी
लोकसभा निवडणुकीनंतर एक रात्री उद्धव ठाकरे यांनी फडणवीसांना फोन करून सांगितले की, “आम्हाला अडीच वर्षांसाठी मुख्यमंत्रिपद हवं आहे. मी तुमच्या वरिष्ठांनाही ही गोष्ट सांगितली आहे. आजच निर्णय घेऊया.” फडणवीसांनी उत्तर दिलं की, ते स्वतः हा निर्णय घेऊ शकत नाहीत आणि अमित शहांशी चर्चा करावी लागेल.
रात्रीच अमित शहांशी बोलल्यानंतर त्यांनी स्पष्ट सांगितलं की, “अडीच वर्षांसाठी मुख्यमंत्रिपद देणं शक्य नाही. आम्ही मोठा पक्ष आहोत, फार तर तुम्हाला उपमुख्यमंत्री पद देऊ शकतो.” ठाकरे यांनी ही अट मान्य केली नाही आणि दोन्ही पक्षांच्या वाटा वेगळ्या झाल्या.
चार दिवसांनंतर पुन्हा संवाद
चार दिवसांनी उद्धव ठाकरे यांच्याकडून पुन्हा संदेश आला की, “चर्चा पुन्हा करूया.” यावेळी मुख्यमंत्रिपदाची मागणी मागे घेतली गेली आणि फक्त अधिक जागा मागण्यात आल्या. शेवटी अमित शहांनी शिवसेनेला पालघरची जागा सोडण्यास सांगितले आणि युती कायम राहिली.
मातोश्रीवरील भेट आणि पत्रकार परिषद
युती जाहीर करण्याच्या आधी उद्धव ठाकरे यांनी अमित शहांना मातोश्रीवर येण्याची विनंती केली. त्या बैठकीत ठरल्याप्रमाणे पत्रकार परिषदेत घोषणा करण्यात आली की, “भाजपच्या नेतृत्वाखाली आम्ही निवडणुका लढवणार असून, देवेंद्र फडणवीस मुख्यमंत्री होतील.” या घोषणेला उद्धव ठाकरेही टाळ्या वाजवत होते, असा दावा फडणवीसांनी केला.
“शरद पवारांसोबत आधीच करार”
निवडणूक निकालानंतर उद्धव ठाकरे यांनी भाजपशी संपर्क टाळला आणि थेट काँग्रेस-राष्ट्रवादीसोबत सत्ता स्थापन करण्याच्या तयारीला लागले. “ठाकरे आधीच शरद पवारांशी समझोता करून बसले होते. काँग्रेसविरोधात शिवसेना, भाजपविरोधात राष्ट्रवादी मदत करेल, असा करार झाला होता,” असा गंभीर आरोप फडणवीसांनी केला.
राजकीय आरोप-प्रत्यारोप कायम
फडणवीसांच्या या आरोपांवर उद्धव ठाकरे काय प्रतिक्रिया देतात, याकडे सर्वांचे लक्ष लागले आहे. महाराष्ट्राच्या राजकारणात शिवसेना आणि भाजपमधील तणाव अद्याप संपलेला नाही, हे मात्र स्पष्ट झाले आहे.