Pakistan : पाकिस्तान क्रिकेटमध्ये अनपेक्षित घटना घडत राहतात, आणि याची एक दुर्मीळ उदाहरण म्हणजे सौद शकीलचा ‘टाइम आऊट’ने बाद होण्याचा प्रसंग. पाकिस्तानमधील प्रेसिडेंट कप स्पर्धेतील अंतिम सामन्यात सौद शकील झोपले होते, त्यामुळे तो फलंदाजीसाठी वेळेत येऊ शकला नाही आणि पंचांनी त्याला नियमांनुसार बाद घोषित केले.
नेमकी घटना कशी घडली?
स्टेट बँक संघाचा खेळाडू सौद शकील हा पाचव्या क्रमांकावर फलंदाजीसाठी येण्याचा क्रमांक होता. पहिल्या डावात इमरान बट आणि रमीझ अझिझ यांनी ८४ धावांची सलामी दिली होती. त्यानंतर उमर अमीन आणि फवाद आलम हे लागोपाठ बाद झाले. त्या वेळी सौदला लगेच फलंदाजीसाठी यायला हवे होते. मात्र, तो ड्रेसिंग रूममध्ये झोपलेला असल्याने मैदानात वेळेत पोहोचू शकला नाही.
क्रिकेटच्या नियमांनुसार, फलंदाजाने त्याच्या आधीचा खेळाडू बाद झाल्यानंतर तीन मिनिटांच्या आत क्रीझवर पोहोचले पाहिजे. मात्र, सौद वेळेत पोहोचू शकला नाही, त्यामुळे पीटीव्ही संघाच्या कर्णधाराने ‘टाइम आऊट’ची मागणी केली, आणि पंचांनी त्याला बाद दिले.
हॅटट्रिक आणि पाकिस्तान बोर्डाचा अनोखा निर्णय
सौद बाद झाल्यानंतर त्याच्या जागी आलेल्या इरफान नियाझीला पहिल्याच चेंडूवर बाद करण्यात आले, ज्यामुळे पीटीव्हीच्या मोहम्मद शरझादने हॅटट्रिक पूर्ण केली. स्टेट बँक संघाची स्थिती १ बाद १२८ वरून थेट ५ बाद १२८ अशी झाली.
या सामन्याबाबत आणखी एक आश्चर्याची गोष्ट म्हणजे पाकिस्तान क्रिकेट बोर्डाने हा सामना रमजानच्या काळात सायंकाळी ७.३० वाजता सुरू करण्याचा निर्णय घेतला होता. प्रत्येक दिवसाचा खेळ पहाटे २.३० वाजेपर्यंत चालणार होता, आणि त्यात टी ब्रेक व डिनर ब्रेकही समाविष्ट होते.
अशा प्रकारे ‘टाइम आऊट’ने आधीही फलंदाज बाद झाले आहेत
सौद शकीलच्या या दुर्मीळ बाद होण्याची घटना क्रिकेटमध्ये काही वेळा आधीही घडली आहे. भारतात २०२३ च्या वर्ल्ड कपमध्ये बांगलादेशविरुद्ध श्रीलंकेच्या अँगेलो मॅथ्यूजला ‘टाइम आऊट’ने बाद देण्यात आले होते. हेल्मेटचा पट्टा तुटल्यामुळे त्याने नवीन हेल्मेट मागवले, पण तो दोन मिनिटांत स्ट्राईक घेऊ शकला नाही. बांगलादेशच्या कर्णधाराच्या अपीलनंतर पंचांनी त्याला बाद दिले होते.
सौद शकीलच्या या घटनेमुळे क्रिकेटविश्वात चर्चा रंगली असून, ‘टाइम आऊट’चा हा दुर्मिळ निर्णय पुन्हा एकदा चर्चेचा विषय ठरला आहे.
