Raj Thackeray : मनसे अध्यक्ष राज ठाकरे यांच्यावर टीका करणाऱ्या गुणरत्न सदावर्ते यांना मनसे प्रवक्ते प्रकाश महाजन यांनी जोरदार प्रत्युत्तर दिले आहे. महाजन यांनी सदावर्ते यांच्या टीकेवर संताप व्यक्त करताना, “ॲट्रॉसिटी कायद्याचे संरक्षण आहे म्हणून कोणीही काहीही बोलावे का?” असा सवाल केला. तसेच, “गुणरत्न सदावर्ते यांच्या मेंदूतील पाण्याची पातळी कमी झाली आहे,” अशा शब्दांत त्यांनी त्यांच्यावर टीका केली.
सदावर्तेंच्या टीकेवर महाजन यांचे प्रत्युत्तर
राज ठाकरे यांनी भय्यूजी जोशी यांच्या वक्तव्यावर प्रतिक्रिया दिल्यानंतर सदावर्ते यांनी त्यांच्यावर खोचक शब्दांत टीका केली होती. “राज ठाकरे यांच्या मुलांनी कोणत्या शाळेत शिक्षण घेतले?” असा प्रश्न उपस्थित करत त्यांनी राज ठाकरे यांचा द्वंद्वात्मक पवित्रा उघड केला होता. त्यावर प्रकाश महाजन यांनी, “हा शब्दप्रयोग योग्य नाही,” असे सांगत सदावर्तेंवर टीकास्त्र सोडले. “जर तुम्हाला ॲट्रॉसिटी कायद्याचे संरक्षण नसते, तर योग्य उत्तर दिले असते,” असेही त्यांनी स्पष्ट केले.
सदावर्तेंची सनद रद्द करण्याची मागणी
बीडमधील हत्याकांडातील आरोपीला “साहेब” संबोधल्यामुळे गुणरत्न सदावर्ते यांची वकील म्हणून असलेली सनद रद्द करावी, अशी मागणीही महाजन यांनी केली. “त्यांची मानसिक पातळी यातून स्पष्ट होते,” असे ते म्हणाले.
सदावर्ते काय म्हणाले होते?
राष्ट्रीय स्वयंसेवक संघाचे नेते भय्याजी जोशी यांनी “मुंबईत येणाऱ्या प्रत्येकाने मराठी शिकावे, असे बंधन नाही,” असे वक्तव्य केले होते. तसेच, “घाटकोपरची भाषा गुजराती आहे,” असा दावा केला होता. या वक्तव्याचे समर्थन करत सदावर्ते यांनी राज ठाकरे यांच्यावर टीका केली होती. “स्वतःची मुले इंग्रजी शाळेत शिकणारे राज ठाकरे दुसऱ्यांना भाषा शिकण्याचा सल्ला देतात, याची कीव येते,” असे ते म्हणाले होते.
मनसे विरुद्ध सदावर्ते – वाद चिघळण्याची शक्यता
या वादामुळे मनसे आणि गुणरत्न सदावर्ते यांच्यातील संघर्ष वाढण्याची चिन्हे दिसत आहेत. महाजन यांच्या टीकेला सदावर्ते काय उत्तर देतात, याकडे सर्वांचे लक्ष लागले आहे.
