Nanded : शिवसेना कॉर्पोरेट झालीये म्हणत आणखी एका मोठ्या नेत्याने सोडली साथ, ठाकरे गटाला खिंडार

Nanded : महाराष्ट्रातील शिवसेना (ठाकरे गट) मधून बाहेर पडणाऱ्या नेत्यांची संख्या वाढत आहे. नांदेडमध्येही पक्षाला मोठा फटका बसला असून, लोकसभा सहसंपर्क प्रमुख डॉ. मनोजराज भंडारी यांनी शिवसेनेला सोडचिठ्ठी देत भाजपमध्ये प्रवेश केला आहे. त्यांच्या या निर्णयामुळे नांदेडमधील ठाकरे गटाच्या संघटनेला मोठा धक्का बसला आहे.

निष्ठावान शिवसैनिकाची नाराजी

डॉ. मनोजराज भंडारी हे मागील ४० वर्षांपासून शिवसेनेत सक्रिय होते. १९८५ पासून पक्षासाठी काम करत त्यांनी अनेक पदांवर योगदान दिले. नुकत्याच झालेल्या विधानसभा निवडणुकीत नांदेड उत्तर मतदारसंघातून उमेदवारी मिळावी म्हणून त्यांनी मागणी केली होती. मात्र, पक्षाने बाहेरून आलेल्या नेत्याला संधी दिली, यामुळे ते नाराज झाले. याच नाराजीच्या पार्श्वभूमीवर त्यांनी पक्षाचा आणि सहसंपर्क प्रमुख पदाचा राजीनामा दिला.

नांदेडमध्ये शिवसेनेत मोठी पडझड

भंडारी यांच्यासह मागील काही दिवसांत नांदेडमधून माधव पावडे (माजी जिल्हाध्यक्ष), पप्पू जाधव (माजी शहराध्यक्ष), एकनाथ पवार (राज्य संघटक) यांच्यासह अनेक पदाधिकाऱ्यांनी शिवसेनेला रामराम ठोकला. त्यामुळे ठाकरे गटाच्या स्थानिक संघटनेसाठी हा मोठा धक्का मानला जात आहे.

शिवसेनेवर टीका – “हिंदुत्व मुद्दा बाजूला पडला”

भाजपमध्ये प्रवेश केल्यानंतर भंडारी यांनी शिवसेनेवर टीकास्त्र सोडले. पूर्वीच्या ८०% समाजकारण आणि २०% राजकारण या विचारधारेऐवजी आता ८०% राजकारण आणि २०% समाजकारण सुरू असल्याचा आरोप त्यांनी केला. तसेच, हिंदुत्वाचा मुद्दाही बाजूला पडल्याचे ते म्हणाले. “शिवसेना आता कॉर्पोरेट कंपनीसारखी वागत असून, राजकीय व्यवसाय वाढवण्यावर भर दिला जात आहे,” अशी टीका त्यांनी केली.

भाजपमध्ये जल्लोषात स्वागत

भाजप प्रदेशाध्यक्ष चंद्रशेखर बावनकुळे यांच्या उपस्थितीत भंडारी यांनी पक्षप्रवेश केला. त्यानंतर नांदेड रेल्वे स्टेशनवर त्यांचे जल्लोषात स्वागत करण्यात आले. पक्षाने त्यांना प्रदेश सह संयोजकपदाची जबाबदारी दिली असून, ते आता भाजपच्या संघटनात्मक वाढीसाठी कार्यरत राहणार आहेत.